Sunday, October 05 @ 22:49:54 GMT+8
Манай улсын төр засгийн өндөрлөгүүдийн хэлсэн үгийг нийгэм огтхон ч шүүмжлэн хэлэлцэхгүй юм. Уул нь эрүүл саруул нийгэмд удирдагчдынхаа хэлсэн үгийг л муулж сайшаан шуугиж байдаг сан. Энэ нь ч манай удирдагчид нонж дорой үг хэлж байдгаас улбаатай юм болов уу даа. Тэд хэзээ, хаана биелэгдэх нь тодорхойгүй, юу хийх гээд байгаа нь мэдэгдэхгүй үг мөн ч их уншицгаах юм. Харин Ерөнхийлөгч асан Н.Багабанди засаглалынхаа сүүлийн жилүүдэд гүн утга санаатай үг хэлдэг болсон сон. Түүний хэлсэн үг ард түмний хэлэлцдэг "Үгэн дотор үг, үхэр дотор гиваан" гэгчээр ямар нэг санаа зорилго агуулсан байдаг. Гэвч төр засгийн удирдагчдын хэлсэн зарим үгийг нийгэмд мэдрүүлэхгүй байлгах сонирхол улс төрийн бүлгүүдийн дунд байх нь бий.
2004 оны шинэ жилээр Ерөнхийлөгч асан Н.Багабандийн "Энэ жил шинэ сонголтын жил болно" гэсэн үгийг "Өдрийн сонин" тайлбарлан олон түмэнд хүргэж байлаа. Энэ үг нийгэмд гүн гүнзгий хүрч сүүлдээ АН-ын сонгуулийн уриа болж байв. Удирдагчдын оновчтой хэлсэн үг нийгэмд ингэж нөлөөлдөг.
Саяын УИХ-ын намрын чуулганы нээлт дээр хэлсэн Монгол Улсын Ерөнхийлөгчийн хэлсэн үг нааштай сонсогдож байна. Ерөнхийлөгч хэлэхдээ өнгөрсөн долдугаар сарын 1-ний хэрэг явдлын учрыг олох хэрэгтэй хэмээсэн. "Ямар нэг хэрэг явдлаар далимдуулан иргэдийг хохироож огтхон ч болохгүй. Хүмүүсийг хохироосон хэнбугай ч цээрлэл үзэх ёстой" хэмээн мэдэгдэв. Монгол Улсын Ерөнхийлөгч Н.Энхбаяр УИХ, Засгийн газрын нэрийн өмнөөс долдугаар сарын 1-ний үйл явдалд ард түмнээсээ уучлал гуйлаа. Өмнө ч гэсэн тэрбээр уучлал хүсэж байсан гэдгээ хэлсэн.
Мөн шинэ Засгийн газрын талаар сөрөг хүчний байр суурь баримтлан ажиллахаа ил тодоор зарлан тунхаглав. Тэрбээр иргэний нийгмийн хяналтыг төр засгийн үйл ажиллагаанд хэрэгжүүлж дарангуйлал тогтох вий гэж болгоомжилсон ард түмний айдсыг үгүй болгох гэнэ. Ерөнхийлөгч энэ талаар хэлэхдээ "...нэг үгээр хэлбэл нийгэм дэх иргэний хяналтыг дэмжиж ажиллана. Ингэж ажиллавал "нийгэмд сөрөг хүчин дутагдана. Хяналтгүй төр засаг тогтоно, ардчилал хумигдана" гэсэн олон түмний эргэлзээ арилна" гэж хэлсэн нь үүнийг баталж байна. Мөн Засгийн газрын үйл ажиллагааны талаар сөрөг хүчний намын даргынх нь хэлж зүрхлээгүй үгийг хэлэв.
Ерөнхийлөгч энэ талаар "Намууд нэгдэн стандарт бус шийдэлд хүрснийг нийгэм янз бүрээр хүлээн авч байгаа. Нэг хэсэг нь үүнийг сонгуулийн луйвар, долдугаар сарын 1-ний будлианаас цэвэр мултрах гэсэн ээлжит жүжиглэл хэмээн үзэж байна. Нөгөө хэсэг нь ингээд хэл үгээ ойлголцоод засаг төр саадгүй байвал боллоо хэмээн горьдон харж байна" хэмээн хэлсэн. Энэ нь ард түмнээс сонгогдож гарсан хүний л хэлэх ёстой үг байлаа. Ер нь ч үе үеийн Ерөнхийлөгчид үргэлж ард түмнийхээ талд үйлчилж ирсэн түүхтэй байдаг. Анхны Ерөнхийлөгч П.Очирбат байна. Тэрбээр МАХН- аас Ардын Их Хурлын дарга, анхны Ерөнхийлөгчөөр нэр дэвшин сонгогдож байсан ч 1993 онд Ардчилсан намаас нэр дэвшин Монгол Улсын Ерөнхийлөгч болж байсан түүхтэй. Тэр үед МАХН УИХ-д 70 гаруй суудал авчихсан нийгэм нэг намын дарангуйлалд орчихсон үе байлаа. Дараагийн Ерөнхийлөгч Н.Багабанди ч МАХН-аас нэр дэвшин сонгогдсон Ерөнхийлөгч. Тэрбээр мөн л нэг нам парламентад хэт олонхи болсон 2000 оноос хойш ард түмнийхээ өмөг түшиг нь байсан. Тэр үед сөрөг хүчин гудамжинд ч байхгүй болтлоо доройтсон байлаа. Энэ цаг үед ганц Н.Багабанди Ерөнхийлөгч л ард түмнийхээ төлөө тэр үеийн дарангуйлагч Н.Энхбаярыг хазаарлан зогсоосон. Н.Багабанди засаглалынхаа тав дахь жилээс ингэж ажиллаж байлаа.
Сүүлийн хэдэн жил парламент дахь хүчний харьцаа тэнцүү байхад Ерөнхийлөгч Н.Энхбаярын үзэл бодол сайн мэдэгдэлгүй өнөөдрийг хүргэсэн. Харин одоо МАХН сонгуульд ялалт байгуулан, сөрөг намаа өөртөө уусган авч парламентад ганц том бүлэглэл үүсчихээд байна. Ийнхүү ямар ч хяналтгүй эрх барих хүчин бодитой болсон үед ард түмнээс сонгогдсон Ерөнхийлөгч сөрөг байр суурьтай болох шиг олз хаа байх вэ. Одоогийн Ерөнхийлөгчийн байр суурь ингэж ард түмний талд болж хувирч байгаа нь эрт юм шиг харагдаж байна. Энэ нь Ерөнхий сайд С.Баяртай харилцах хувийн харилцаанаас ч улбаатай байж болох юм. Мөн өөрийнх нь ч үзэл бодол ихээхэн нөлөөлдөг биз ээ.
Тэрбээр "Монгол Улсын Ерөнхийлөгч байсан хүн албаа дуусгаад аль нэг намын харьяанд орох гутамшигтай юм. Тиймээс намын харьяаллыг болиулах хэрэгтэй" гэж ярьдаг нь дуулддаг. Гэвч хоёр намын хуйвалдаанд залгиулж дуусах ард түмэнд ийм том институц сөрөг байна гэдэг л хэрэгтэй юм болж байна.
Жамбалын Сандагдорж
http://www.dailynews.mn/modules.php?name=News&file=article&catid=61&sid=19461
Posts
No comments:
Post a Comment