О’Нил: АНУ-ын компаниуд технологио Монголд оруулж ирэхэд бэлэн байна

(2008-09-18)
Монгол Улсын Ерөнхийлөгч Н.Энхбаярт АНУ-ын Худалдааны яамны Олон улсын худалдааны асуудал эрхэлсэн дэд сайдын орлогч Мишель О’Нил бараалхлаа.

Ерөнхийлөгч Н.Энхбаяр “АНУ бол манай гурав дахь түнш. Тус улсын Ерөнхийлөгч Ж.Буш Монголд айлчлахдаа америкчууд Монголыг “гурав” дахь түнш хэмээн хүлээн зөвшөөрч байгааг илэрхийлсэн. Энэхүү түншлэлийн харилцаа хоёр талын эдийн засгийн хамтын ажиллагаанд ихээхэн ач холбогдолтой” гэв. Мөн АНУ-ын Мянганы сорилтын сангаас 285 сая ам.долларын буцалтгүй тусламж олгож буй нь манай улсын хөгжилд ихээхэн хувь нэмэр оруулна гэдэгт итгэж байгаагаа илэрхийллээ.

АНУ-ын худалдааны баг төлөөлөгчид Монгол Улсад ирээд байгааг хатагтай М.О’Нил Төрийн тэргүүнд илтгэлээ. О’Нил “Америкийн бизнесийнхэн Монголын бизнесмэнүүдтэй түншлэх асуудлаар уулзаж байна. Бизнесийн төлөөлөгчдийн дунд кино сэргээж хадгалдаг мэргэжлийн байгууллагынхан ч бий. Тэд социализмын үед хийсэн Монгол киноны хальсуудыг сэргээн хадгалах талаар ярилцаж байгаа. “Рио Тинто” зэрэг уул уурхайн компанийн төлөөлөгчид ирсэн. АНУ-ын компаниуд өөрсдийн технологио Монголд оруулж, аль аль талдаа ашигтай ажиллах, Монголын зах зээлд шударга өрсөлдөхөд бэлэн байна” хэмээн ярилаа.

http://www.mongolnews.mn/unuudur.php?n=31449