Saturday, September 20 @ 00:47:57 GMT+8
Монгол Улсын Ерөнхийлөгч өчигдөр Засгийн газрын сайдад нэр дэвшигчидтэй нэг бүрчлэн уулзаж ярилцлаа. Сайд нар ажлаа юунаас эхлэх гэж байгаа талаар сэтгэгдлийг нь сонслоо.
С.Баярцогт:
-Хамгийн их санаа зовоож буй асуудал бол инфляцийн өсөлт. Нэг жилд 34 хувиас давсан нь ажиглагдаж байна. Иймээс хамгийн түрүүнд Сангийн яамнаас инфляцийг тогтоон барих ёстой. Инфляци өсөхөд дэлхийн эдийн засаг хямралын байдалтай гэсэн прогнозыг эрдэмтэд гаргаад байгаа. Мөн үл хөдлөх хөрөнгөөс үүдэлтэй санхүүгийн хямрал үргэлжилж байна. Хэдийгээр энэ нь жижиг оронд нөлөөлдөггүй гэдэг боловч зайлшгүй нөлөөлөх байдал ажиглагдаж байна. Манай хоёр хөршийн хувьд БНХАУ-ын эдийн засаг харьцангуй тогтвортой байна. Төсвийн болон мөнгөний хатуу бодлогыг уялдуулж явуулах шаардлагатай гэж бодож байна. Ингэхдээ Засгийн газрын зардлыг бууруулах ёстой, мөн тэвчиж болохуйц зардлыг хязгаарлах ёстой гэсэн бодолтой байна.
Х.Баттулга:
-Энэ салбарт өмнө нь хөгжүүлье босгоё гэсэн санаанууд байсан учир нэлээн дөхөмтэй байгаа. Юуны түрүүнд БНХАУ, ОХУ-ын хоорондох худалдааны эргэлтийг сайжруулахад газар зүйн байрлалын хувьд манай улсын зам ашигтай. Мөн давхар төмөр замын асуудал яригдаж байгаа юм билээ. Мөн Улаанбаатар хотын замыг сайжруулах, хөдөлгөөний түгжрэлийг арилгах зэрэг асуудалтай тулгараад байгаа. Аймгуудын хатуу хучилттай замаар холбоно гэсэн санаа байгаа юм билээ. Төмөр зам болон засмал замыг барьж байгуулах түүхий эд нь манайд байдаг.
Орон сууцны хэрэгцээ жилээс жилд өсч байгаа. 2005 онд 130 мянга байсан бол энэ онд 150 мянга болж өссөн байгаа. Орон сууцжуулснаар утааны асуудал зэрэг шийдэгдэх боломж бий. Мөн орон сууцны өртөг жилээс жилд өсч байгаа гэсэн тооцоо байдаг. Үүнийг багасгахын тулд цементний үйлдвэрийг барьж ашиглалтад оруулах шаардлагатай. Манай улсад түүхий эд бий. Мөн арматурын төмрийг дотооддоо үйлдвэрлэх тухай бодолтой байна.
Т.Ганди:
-НХХЯ бол Монгол Улсын нийт хүн амын хувь заяатай шууд хамааралтай. Нийгмийн хамгааллын бодлого зөвхөн ядуу хүнд үйлчилдэггүй. Тэтгэвэр тэтгэмж, цалин хөлс хөдөлмөрийн үнэлэмж, даатгал гэхчилэн бүхий л бодлогоороо хүн болгонд хамааралтай үйл ажиллагааг зохицуулж байдаг. Юуны түрүүнд ажлын байр бий болгох, ядуурлыг бууруулах асуудлаар хамтарсан Засгийн газрын тавьж байгаа мөрийн хөтөлбөрийг хэрэгжүүлэх талаас оновчтой бодлогуудыг гаргаж яаралтай хэрэгжүүлж эхлэх хэрэгтэй байна. Мөн УИХ дээр хүлээгдэж байгаа олон эрх зүйн актууд бий. Нийгмийн бодлогын байнгын хорооны дарга байсны хувьд хэлэлцүүлгийн эхний шатанд тавьсан ахмад дайчдын орон сууцны хангалтын асуудал, ядуурлын индексийг оновчтой тогтоох зэрэг асуудлуудыг эрхзүйн түвшинд боловсронгуй болгох, тэтгэврийн шинэчлэлийн асуудлуудыг хийж эхэлнэ.
Н.Алтанхуяг:
-Ерөнхийлөгчид Засгийн газарт орж ажиллах болсон шалтгаан нөхцөл байдлын тухай хэлэхдээ хоёр нам хамтарч хүмүүсийнхээ амьжиргааг дээшлүүлэх чиглэлд хамтарч ажиллая гэсэн юм. Миний хамаарч ажиллах асуудлын хүрээнд олон асуудлууд бий. Тэр дотроос томоохон нь үйлдвэржилтийн асуудал байгаа. Үүнийг хэрэгжүүлэхийн төлөө ажиллана. Намуудын зөвшилцлийг хангахын тулд зүтгэнэ. Ерөнхийлөгч хүмүүсийн ахуй амьжиргааг дээшлүүлэхийн тулд сайн ажиллаарай гэж захиж байна. Бас Аюулгүй байдлын зөвлөлийн хуралд тэргүүн шадар сайдыг оролцуулж байя гэсэн.
Лу.Болд:
-АН Засгийн газарт ажиллах хөтөлбөр болон бүтцэд орж ажиллах хүмүүсээ нухацтайгаар томилсон. Миний хувьд энэ салбарыг хариуцан ажиллана гэж урьдаас төлөвлөсөн зүйл байгаагүй. АН-ын удирдлагаас итгэл хүлээлгэж үүрэгт ажил хүлээн авсан. Тусгаар тогтнолын баталгаа болсон энэ салбарыг хөгжүүлэхийн төлөө өөрөөсөө шалтгаалах бүгдийг хийх болно. Аюулгүй байдлын зөвлөлтэй байнга хамтран ажиллана. Үнэтэй зөвлөгөө өгсөн танд баярлалаа. Монгол Улсын төлөө зүтгэе.
Л.Гансүх:
-Дэлхийн дулаарал, байгаль орчны бохирдол, байгалийн экологийн тэнцвэрийг алдагдуулж байгаа асуудалтай аль болох тэмцэх нь зүйтэй юм. Монгол Улсын хувьд эрчимтэй хөгжих жилүүдэд уул уурхайн чиглэлийг барих нь ойлгомжтой. Эдийн засгийн хөгжлийн энэ явц Засгийн газрын олон жилийн хүлээгдэж байгаа үүргийн нэг. Тэгэхээр эдийн засгийн хөгжлийн сацуу ирээдүй хойч үеэ эрүүл зөв, экологийг хадгалахын тулд Байгаль орчин, аялал жуулчлалын яам онцгой бодлоготой ажиллах ёстой болоод байна. Энэ чиглэлээр тусгай бодлого явуулна. Бэлчээрийн цөлжилт, усны бодлогыг анхааралдаа авч байна.
Шинэ Засгийн газрын мөрийн хөтөлбөрт тусгагдах шинэ зорилтыг хэрэгжүүлнэ.
С.Ламбаа:
-Олон жил парламентад сууж байсан ч гүйцэтгэх засаглалд анх удаа орж ажиллах гэж байна. Эрүүл мэндийн салбарт 2021 он хүртэл үе шаттайгаар хийгдэх шинэчлэлийн ажил байна. Орчин үеийн оношилгоо, эмчилгээний төв байгуулах нь нэн чухал. Эрүүл мэндийн даатгалын тухай хуульд нэмэлт өөрчлөлт оруулж, хүн бүрийг даатгалд хамрагддаг байхад анхаарлаа хандуулах нь зүйтэй. Бүтэц тогтолцооны зэрэгцээ эрүүл мэндийн салбарт шинжлэх ухааны дэвшилтэт шинэ технологийг нэвтрүүлье.
http://www.dailynews.mn/modules.php?name=News&file=article&top&sid=19117&catid=49
Posts
No comments:
Post a Comment