GLAMORE Yumjir Fashion Show,
Ulaanbaatar Hotel, October 11th
Үржнээгийн Юмжир: Монгол үндэсний хувцсыг дураараа өөрчилж байгаад харамсдаг
Thursday, October 02 @ 16:19:22 GMT+8
Ардын зураач Ядамсүрэнгийн ач охин дизайнер Юмжир өвөө аавынхаа дурсгалд зориулж загварын үдэшлэг хийхээр бэлтгэж байна. Ардын зураачийн хүү нь төрийн шагналт зураач Үржнээ. Удам дамжсан нэртэй уран бүтээлчийн үр сад юу сэдэж бүтээгээ юм бол. Энэ талаар Ү.Юмжиртэй ярилцлаа. -Өөрийн чинь хийх гэж байгаа загварын шоуны тухай сонслоо. Хэзээ болох юм бэ?
-Энэ сарын 11-нд Улаанбаатар зочид буудалд "Гламур" нэртэй бие даасан загварын шоу зохион байгуулах гэж байгаа. Энэ сард хийхээр товлосны учир гэвэл шинэ жил дөхөж байгаа учраас бүсгүйчүүдэд зориулсан гоёлын даашинзны загваруудаа үзүүлэх юм. Мөн өвлийн болон үндэсний, өдөр тутмын, гоёлын гээд бүхий л чиглэлээр нийт 100 гаруй загвар бэлдсэн байгаа. Манай өвөө бол ардын зураач Ядамсүрэн. Аав маань төрийн шагналт зураач Үржнээ. Хүмүүс мэдэх байх. Өвөө маань үндэсний угсаатны зүйн чиглэлээр асар их зүйл судалж үлдээсэн. Монгол үндэсний хувцсыг маш эртний үеэс нь судалж, угсаатны зүйн судлалаар олон альбом, ном гаргасан байдаг. Тийм болохоор энэ шоу арга хэмжээгээ өвөө аавынхаа дурсгалд зориулж хийж байгаа юм. "Гламур" гэдэг нь ямар учиртай вэ гэхээр дур булаам, сэтгэл татам гэсэн утгатай үг. Ер нь бүсгүйчүүддээ л зориулсан шоу.
-Та энэ чиглэлээрээ ажилладаг уу?
-Би "Урлах-Эрдэм" дээд сургуулийг 2001 онд төгссөн. Дараа нь санхүүгийн чиглэлээр дахин сурч байгаа. Гэхдээ загвар зохион бүтээх ажлаа орхиогүй ээ. Миний хобби гэж болно. Хүмүүсээс захиалга ч ирдэг. Одоо харин энэ чиглэлээ түлхүү барина гэж бодож байна даа.
-100 гаруй загвар байгаа гэлээ. Өмнө нь хийсэн бүтээлүүд үү, сүүлийн үеийнх үү?
-Энэ шоугаа нэг жилийн өмнөөс хийе гээд төлөвлөсөн байсан. Одоогийн загварын чиг хандлагад тулгуурласан хувцаснууд л даа. Бүхий л чиглэлийн загварууд багтсан байгаа.
-Загвар зохион бүтээгчид ямар улиралд шоу хийж байгаагаасаа шалтгаалаад тухайн улирлын хувцасны загварыг тодорхойлдог. Энэ өвөл таныхаар ямар загварын хувцас ноёлох бол...
-Очоод үзээрэй л гэж хэлмээр байна. Мэдээж, орчин үеийн загварын чиг хандлагыг баримталсан. Үүн дээрээ өөрийнхөө санаа оноог оруулна. Дизайнер хүн чинь өөрөө зохиох ёстой шүү дээ.
-Өвөл болохоор хүн бүр л зузаан хувцас өмсч, ерөнхийдөө загвар моод энэ тэрийг орхичихдог. Үүнтэй та санал нийлдэг үү?
-Хамгийн түрүүнд дулаахан хувцаслах хэрэгтэй. Гэхдээ таны хэлсэнтэй санал нийлэхгүй. Өвөл ч гэсэн хүн гоё харагдах хэрэгтэй. Манайх үслэг эдлэл, нэхийгээр баялаг шүү дээ. Тийм болохоор үүгээр ямар ч загварын хувцас хийж болно. Би хувьдаа их өвөрмөц хувцас өмсөх дуртай.
-Та өөрийнхөө хувцсыг өөрөө хийж өмсдөг үү?
-Загасчны морь усгүй гэгчээр өөртөө бараг юм хийж өмсдөггүй. Гэрийнхэн, ойр дотныхон, найз нөхдөдөө хийгээд өгчихдөг хэрнээ өөртөө хийхээр болдоггүй юм.
-Хүмүүсээс захиалга их ирнэ биз?
-Ирнээ. Өөрөө дуртай юм болохоороо ажлынхаа зав зайгаар хийгээд өгдөг. Ер нь нэг үеэ бодвол манайхан яг өөртөө тохирсон давтагдашгүй, нэг загварын хувцас өмсөх гэдэг болсон байна. "Урлах-Эрдэм" сургуулиа төгссөний дараагаар нэг хэсэг хувцас загварын салон ажиллуулж байсан. Одоо үед дан ганц нэг мэргэжлээр явахгүй болсон байна. Тийм болохоор санхүүгийн чиглэлээр сурсан. Ямар ч байсан шоу хийхэд төсөв зардлаа өөрөө тооцоод, яавал ашиг орлого олох, хүмүүст бүтээлээ яаж хүргэх вэ гэх зэрэг маркетингийн талын мэдлэгтэй болдог юм байна. Загварын чиглэлээр хичнээн авьяастай байсан ч өөр зүйлтэй хослуулбал илүү үр бүтээлтэй юм шиг санагддаг.
-Материалаа хаанаас авдаг вэ?
-Бээжингээс авчирдаг. Өөрөө сонгож авчирсан болохоор материалдаа сэтгэл хангалуун байгаа.
-Гоёлын даашинзны загвар байгаа гэсэн. Шинэ жил дөхөхөөр бүсгүйчүүд даашинзны эрэлд гардаг. Мэдээж, тэдэнд таалагдах шинэ загварууд бий биз?
-Байлгүй яахав. Үндэсний хувцасны төрөл дээр хэлмээр санагддаг зүйл байдаг. Монгол үндэсний хувцас гээд тодорхой загвар байна. Үүнийг хэтэрхий өөрчлөөд монгол хувцасны утгыг алдагдуулах тал ажиглагддаг. Үндэсний хэв маягаа хадгалсан хэрнээ өвөрмөц зүйл хийх хэрэгтэй санагддаг. Тэгэхгүй бол зохиолын дуучдаас эхлээд төгсөгчдийн хонхны баяр гээд дандаа нэг хэв загварын адилхан хувцас өмсдөг болсон. Монгол хувцсыг дэндүү эвдээд байгаад нь харамсалтай санагддаг. Би орчин үеийн охидуудад зориулсан өдөр тутам өмсөөд явж болох загварууд хийсэн байгаа. Шоунд ч өмсөөд явж болох охидод зориулсан шинэ загварууд. Монгол хувцасны элементийг орчин үеийн хувцсан дээр оруулахдаа учиртай л оруулах хэрэгтэй гэж боддог. Миний хийсэн хувцаснууд нэлээд чимэглэлтэй, гар ажиллагаа их орсон.
-Өвөөгийнхөө дурсгалд зориулж байгаа гэлээ. Өвөөгөө хэр сайн мэдэх вэ?
-Манай өвөө монгол үндэсний хувцасны тал дээр үнэхээр их зүйл хийж, хойч үедээ үлдээсэн. Хүмүүст тэр чиглэлээр үзэх харах зүйл үлдээсэн. Хэрэв монгол үндэсний хувцас ямархуу байдаг вэ гээд үзье гэвэл өвөөгийн судалж үлдээсэн тэр бүхнийг хардаг. Би өөрөө ч энэ чиглэлээр судалж, сонирхдог. Монгол үндэсний хувцсыг хамаагүй замбараагүй өөрчилж болохгүй л санагддаг. Үндсэн хэв шинжийг нь ямагт хадгалж явах хэрэгтэй.
-Таны хийсэн хувцаснаас хамгийн их ажиллагаа орсон ямар загвар байна?
-Гоёлын даашинзууд. Шүр сувдаар шигтэж, гар ажиллагаа их орсон. Зөвхөн чимэглэлийг нь хийх гэж гурав дөрвөн өдөр суусан даашинз ч байгаа.
-Хамгийн үнэтэй нь?
-Битүү чимэглэлтэй гоёлын даашинзууд маань. Хөлс хөдөлмөр шингэсэн, гар ажиллагаа орсон гэдэг утгаараа.
-Хүмүүс худалдан авъя гэвэл болох уу?
-Шоу дууссаны дараа бол болно. Таалагдсан загвараараа захиалж болно.
-Загвараа гаргалаа гэхэд хэн оёх вэ?
-Эсгүүр, оёдол гээд хувцсаа өөрөө хийнэ. Мэдээж, хамтарч ажилладаг тусалдаг оёдолчид байгаа.
-Дизайнерүүд дандаа нарийхан, гуалиг бүсгүйчүүдэд зориулсан загвар гаргадаг. Махлаг эмэгтэйчүүдэд зориулсан загварууд хийх үү?
-Махлаг хүмүүс тайзан дээр загвар өмсөөд алхахгүй учраас модельд тааруулж хийсэн хувцас махлаг эмэгтэйчүүдэд таалагдвал хэмжээг нь тохируулаад хийж болно шүү дээ. Харин хэр зохих эсэхийг нь дизайнер нь зөвлөж өгөх хэрэгтэй. Түүнээс биш махлаг бүсгүйчүүдэд зориулсан загвар хийлээ гэхэд түүнийг өмсөж хүмүүст үзүүлэх модель байхгүй шүү дээ.
Д.Оюунтуяа
http://www.dailynews.mn/modules.php?name=News&file=article&catid=4&sid=19393
Posts
No comments:
Post a Comment